Thursday, August 13, 2015

KAPAGI'TIKAF



بسم الله الرحمن الرحيم

So Kapagi’tikaf na giyanan so Kakadn (katarg) o Muslim sii sa Masjid a raks a makaniniyat sa i’tikaf.

Aya kokoman o Kapagi’tikaf na Sunnah Muakkadah sii ko apiya antonaa oras ago masa.

قال الشيخ محمد أمين الإربلي الشافعي (ت: 1914 م): "وهو (أي الإعتكاف) سنة مؤكدة كل وقت". اهـ
Pitharo o Shaikh Muhammad Ameen Al-irbili Asshafi’i: “So Kapagi’tikaf na Sunnah Muakkadah a Kokoman iyan sii ko apiya antonaa dn a masa”.

قال الإمام محمد نووي الجاوي: "و هو سنة في كل وقت". اهـ
Pitharo o Imam Nawawi Al-Jawi: “So kapagi’tikaf na Sunnah sii ko apiya antonaa dn a masa”.

   Aya maana niyan na miyakatana a so Kapagi’tikaf na Sunnah ko apiya antonaa dn a masa, na misabap san na sadn sa Kabaya o Muslim a masa a kaphagi’tikaf iyan ka mlagid o aya pinili iyan a gawii na Isnin, odi na salasa, odi na arbaa odi na Khamis na Palaya dn khapakay. Na sadn sa tao a tharoon iyan a Haram odi na Bid’ah so kapagi’tikaf sii ko mappnto a gawii na sabnar a madadadag i Kpit a patot so kapananggilai ron ka liyawanan iyan sa kokoman so Nabi ago so mga sahaba ago so Pat a Imam, ka dadn matharo o Nabi ago so mga sahaba ago so pat a Imam iba Haram odi na Bid’ah so katndo o Muslim sa gawii a ron iyanon ipthabo so i’tikaf iyan.

    So kapagi’tikaf na khapakay a mbalaoy a wajib (paliyogat) sii ko tao, na aya kapmbaloy niyan a wajib sii ko tao na opamaka minizamaya iyan, sa aya ibarat iyan na Tigiyan: “ipzamaya akn aki ko Allah ka phagi’tikaf ako sa giyai a khauma a khamis!” na Patot a mitoman iyan ka mimbaloy ron a wajib a kailangan na mitonay niyan a makapagi’tikaf sii ko masa a Bitho niyan.


MGA KALBIHAN AGO BALAS O KAPAGI’TIKAF

عن ابن عباس قال: قال رسول الله صلى الله عليه وسلم : " من اعتكف يوما ابتغاء وجه الله جعل الله بينه وبين النار ثلاث خنادق أبعد مما بين الخافقين ". رواه الطبراني والحاكم .
Miyakathitayan Ko Ibn Abbas, Pitharo iyan: Pitharo o Rasoolullah (S): “Sadn sa tao a magi’tikaf sa salongan bo a para sowasowat iyan ko Allah na awatn ska niyan o Allah ko Naraka sa diyangka a Tlo a kakar a mas mawatan uto a di so pagltan o sdpan ago sbangan”. Piyanothol o Imam Tabarani.

قال رسول الله صلى الله عليه وسلم : "من اعتكف فواق ناقة فكأنما أعتق نسمة".
Pitharo o Rasoolullah (S): “Sadn sa tao a magi’tikaf sa miyakakampkampt a oras na Timbang a Lagid o miyakamaradika sa bisaya”.

عن عائشة أن النبي صلى الله عليه وسلم قال : " من اعتكف إيمانا واحتسابا غفر له ما تقدم من ذنبه ". رواه الديلمي
Miyakathitayan ko Aisha a mataan a so Nabi (S) na Pitharo iyan: “Sadn sa magi’tikaf sa sowasowat iyan ko Allah na inirilaon o Allah so miyangauuna a dosa niyan”. Piyanothol o Imam Dailami.

عن الحسن قال : "للمعتكف كل يوم حجة". رواه البيهقي. قال البيهقي : لا يقوله الحسن إلا عن بلاغ بلغه
Pitharo o Hasan: “Bagian o Tao a Magii’tikaf so Balas a Naihaji sii ko oman gawii”. Piyanothol o Imam Al-Baihaqi

 عَنْ ابْنِ عَبَّاسٍ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ فِي الْمُعْتَكِفِ : " هُوَ يَعْكِفُ الذُّنُوبَ ، وَيُجْرَى لَهُ مِنْ الْحَسَنَاتِ كَعَامِلِ الْحَسَنَاتِ كُلِّهَا".  روى ابن ماجه
Miyakathitayan ko Ibn Abbas: mataan a so Rasoolullah na aya katharo iyan ko mipantag ko tao a magii’tikaf: “So tao a magii’tikaf na masasang ka iyan so mga dosa na aya mitotoronon na so mga Mapipiya sa Lagid oba niyan miyanggalbk so Langowan a mapiya”. Piyanothol o Ibn Majah.



SO KAPAGI’TIKAF O BABAY

So kapagi’tikaf na knaba sii bo ko mama ka taman ko babay na piphakay ron so Kapagi’tikaf sii ko Masjid a dii mbarajoma-an. Aya dalil na so Nabi na inidinan iyan so Aishah a makapagi’tikaf sa Masjid. Giyanan i Tindg o Kadaklan ko mga Ulama a siran so mga Maliki, go mga Shafi’i, ago mga Hambali.

وقال الإمام الشافعي: "والمرأة والعبد والمسافر يعتكفون حيث شاءوا - أي من المساجد - لأنهم لا جمعة عليهم". اهـ الأم

Pitharo o Imam Shafi’i: “So Babay ago so Bisaya ago so Tao a giimlayalayag na Khapakay a Magi’tikaf siran sii ko kabaya iran a Masjid, sabap sa knaba Kiran wajib so Jumu’ah”.

وقال ابن قدامة: «وللمرأة أن تعتكف في كل مسجد ». اهـ المغني

Pitharo o Imam Ibn Quddamah: “Mapapakay ko babay so kapagi’tikaf sii ko Langowan a Masjid”.


SO MGA PHAMAKABATAL KO KAPAGI’TIKAF

1-  So kaliyo sa masjid a knaba sii ko nisisita.
2-  Kapmortadd.
3-  Kala a kabrg.
4-  Kaliwat.
5-  Kapakauma o Haidh sii ko bae.
6-  Nifas.
7-  Kambabangonan sa walay o mama ago babay.
8-  So kapakaliyowa ko mani a miyokit sa pimbaba.


SO KAPAGI’TIKAF SII KO OMAN GAWII A KHAMIS

    Aya sabap a kaphagosaya tano san na kay sabap sa adn a saba-ad a salafi sa ranao a Piyakabid’ah niyan so kapagi’tikaf sii ko gawii a Khamis ka aya antap iyan na phakignk iyan so gikapagi’tikaf o mga Tablig sii ko oman khamis sii sa Markaz Abubakr sa Marawi. ka aya kon a kapagi'tikaf na sii bo ko Ramadan.

    So kapagi’tikaf na knaba sii bo ko ramadan a kababaloy niyan a Sunnah ka taman ko knaba Ramadan na Sunnah dn a kokoman iyan sa apiya antonaa dn a gawii ago ulanolan. na aya kala iyan i balas igira a Ramadan na sabap ko so amal (simba) sii ko ramadan na gii thaktakpn so balas iyan.


   So kapagi’tikaf na Simba a Lagid o khakalilid a simba a mapapakay so kinggolalan non sii ko apiya antonaa a gawii ago ulanolan, sa aya Lagid iyan na datar o kabatiya sa Qur-an a mapapakay ko apiya antonaa dn a gawii ago ulanolan, ago so Kapangadi sa madrasah na mapapakay ko apiya antonaa gawii ago ulanolan, ago so kabangon sa islamic simenar na mapapakay ko apiya antonaa gawii ago ulanolan, ago so kazazadka na mapapakay ko apiya antonaa gawii ago ulanolan, na datar anan mambo so kapagi’tikaf a mapapakay mambo ko apiya antonaa gawii ago ulanolan, ka mismo so dn so mala a ulama o mga Salafi a si Shaikh Binbaz na Tatarimaan iyan a so Kapagi’tikaf na knaba sii bo ko Bolan a Ramadan ka mapapakay ko apiya antonaa dn a masa. Kataya so katharo iyan:



قال الشيخ عبد العزيز بن باز: "وإن اعتكف في غير رمضان كشوال أو ذي القعدة أو ذي الحجة أو محرم أو غير ذلك فلا بأس، سنةٌ مطلقة في جميع الزمان". اهـ
Pitharo i Shaikh Binbaz: “Opamaka pagi’tikaf so tao sii ko knaba bolan a ramadan ka Lagid o bolan a Shawwal odi na bolan a Dhul qi’dah, odi na Dhulhijjah, odi na sii ko Bolan a Muharram ago so salakaw san a masa na Mapapakay, ka so Kapagi’tikaf na Sunnah sii ko apiya antonaa dn a Masa”. Giyanan i katharo i Binbaz.

    So diyon gi katharoa o saba-ad a mga salafi sii sa ranao a so kon so Kapagi’tikaf ko gawii a khamis na bid’ah ka aya kon bo a kapagi’tikaf na sii bo ko Bolan a Ramadan, Na sabnar a miyasopak iran si Shaikh iran a si Binbaz, ago miyakatoro sa inombawan iran sa Katao.!.

Aya pd a dalil iran na kay kon a so Kapagi’tikaf na Simba na so katndoi ko Simba sa oras odi na gawii na Mimbaloy kon a Bid’ah, na giyanan a tigiran i sabap a Bid’ah so gikapagi’tikaf o mga Tablig sa Markaz Abubakr sii ko oman gawii a Khamis!.

Smbag: So simba na dowa soson: simba a adn a mattndo a masa niyan a datar o Hajj a piyakatana o Nabi so masa niyan, na di khapakay iba nga salina so masa o Hajj a Tindo o Nabi. Ikadowa a simba na piyakambayabaya tano ron o Nabi sa kipnggolalan tano ron ko apiya antonaa dn a oras ago gawii ago ulanolan, sa aya ibarat iyan na datar o kabatiya sa Qur-an a mapapakay rka a sadn sa tndoon ka oras ago gawii a kapmbatiya aka sa Qur-an na Mapapakay, ago so kasasadka na mapapakay rka a apiya antonaa dn a oras ago gawii i tndoon ka sa kapsasadka nga na Mapapakay, ago so kapangosiyat ago so kapamakin’g sa wasiyat na sadn sa oras ago gawii a tndoon ka a pangosiyat kaon odi na phamakin’g kaon sa wasiyat na Mapapakay, na Lagid mambo anan o kapagi’tikaf ka sa Markaz Abubakr sii ko gawii a khamis na Mapapakay sa asar ka aya niyat ka na knaba uto Wajib a a kinipantagn kaon sa giyoto a gawii a miyapili ika ka aya sabap a kiyapili a nga sa giyoto a gawii na roo kaon mapaparo sa gawii uto.

    Ago aya Tanodan tano san na knaba aya antap a kiyatndoa ko i’tikaf ko oman Khamis sii sa Markaz naba aya mapipikiron na Wajib (Paliyogat)! ka aya sabap a kiyatndoa ko oman gawii a khamis a i’tikaf sii sa Markaz Abubakr na sabap sa aya pinakamala a antap roo na so kapmbgi sa wasiyat (bayan) ko mga tao sii sa giyoto a gawii, na Lagid iyan bo ka pkhapantagan siran roo a gagawii na roo siran dn mambo phagiga sa mniniyat siran sa i’tikaf ka para Dowa a balas a khakowa iran, ka balas o kapamakin’g sa wasiyat ago balas o kapagi’tikaf.

    Ago Liyo roo pn na so Kabgay sa wasiyat (bayan) odi na so kapamamakin’g sa wasiyat sii ko oman gawii a Khamis na ulaola dn anan o mga Sahaba sii ko masa iran. Kataya so dalil na batiya a nga:

عن أبي وائل ، قال : كان عبد الله بن مسعود يذكرنا كل يوم خميس ، فقال له رجل : يا أبا عبد الرحمن ، إنا نحب حديثك ونشتهيه ، ولوددنا أنك حدثتنا كل يوم ، فقال : ما يمنعني أن أحدثكم إلا كراهة أن أملكم ، إن رسول الله صلى الله عليه وسلم كان يتخولنا بالموعظة كراهة السآمة علينا .رواه مسلم

Miyakathitayan ko Abiwael, a Pitharo iyan: “Aya ulaola o Abdullah Bin Mas’ood (Radhiallahu anhu) na dikaminiyan gipangosiyatan sii ko oman gawii a Khamis. Na adn a sakatao a pitharo iyan ko Abdullah Bin Mas’ood: Hay Abu Abdurrahman, mataan a masosowat kami ko kapmbgi nga (rkami) sa wasiyat na aya kabaya ami na pmbgi kami nga sa wasiyat sii ko oman gawii. Na aya Pitharo o Abdullah Bin Mas’ood: Aya usto a diko rkano kakhabgi sa wasiyat sii ko oman gawii na kalk akn iba kano Bokla (mamamakin’g) ka mataan a so Rasoolullah na aya ulaola niyan na aya kapmbgi niyan rkami sa wasiyat na sii ko mga masa maggdam iyan rkami a kapakakakasag ami (ka di kami niyan mbgan sa wasiyat ko oman gawii) ka pangali iyan iba kami masmo mamamakin’g. Piyanothol o Imam Muslim.

    Misabap san na Miyakarayag a so kaphamakin’g o tao sa Wasiyat (Bayan) sii sa Markaz Abubakr sii ko oman gawii a Khamis ago so Kapagi’tikaf iyan roo sii sa giyoto a gagawii na dowa a balas a khakowa niyan: Balas o kapamakin’g sa wasiyat ago Balas o kapagi’tikaf. Na sadn sa tao a pakarataan iyan anan na Timbang a aya piyakarata iyan na so Kapamakin’g sa wasiyat ago so kapagi’tikaf !.

    Miya-aloy Tano a aya dalil o mga tao a Piyakarata iran so Kapagi’tikaf sii ko oman khamis sa Markaz Abubakr na kay kon a so Simba a Tndoan ka sa Oras a knaba giyoto i oras a kininggolalan non o Nabi na mimbaloy kon a Bid’ah kay sabap sa mimbaloy kan a adat!. Giyanan i Dalil iran.

Aya smbag sa dalil iran anan na sabap ko pitharo iyo a so Simba a Tndoan ka sa Oras a knaba giyoto i oras a kininggolalan non o Nabi na mimbaloy a tigiyo a Bid’ah kay sabap sa tigiyo a Biyaloy a adat! na aya dn aki a miyakokom iyo sa Bid’ah na so miyamakalala a mga imam/ulama gowani a mga alai sabot ko Qur-an ago Hadith, na samporna ki Imam iyo a si Ibn Taimiyah na miyakokom iyo pn sa Bid’ah ka adn a simba niyan a Tindoan iyan sa Oras a knaba giyoto mambo i oras a kininggolalan non o Nabi (S) ka mimbaloy dn a aya dn Adat i Ibn Taimiyah sii ko oman gawii. Kataya a Pagalowin tano:

Si Ibn Taimiyah a Imam iyo na aya ulaola niyan (adat iyan) na oman makasambayang sa Sobo na aya bo a dii niyan gikhakasokasowin a dhikr iyan na sobo so Surah Al-Fatiha a raks a Lomalangag sa Langit na dii niyan gipakambbkabkarn a mbala a mata niyan, na giyoto dn i sosowaan iyan sa taman dn uto ko kapakasbang o Alongan. Na aya dn a miyanothol san na so Morit i Ibn Taimiyah a si Al-Bazzar sii ko Kitab iyan a bithowan iyan sa: “Al-A’laamul’Aliyyah Fee Manaqibi Ibn Taimiyah” Page 38.

    Samanaya na Khakokom iyo mambo sa Bid’ah si Imam iyo a si Ibn Taimiyah ka so Surah Al-fatiha na Tindoan iyan sa oras a kapmbatiyaa niyanon, abadi knaba giyoto i oras a Tindo o Nabi a ipmbatiya iyan ko Fatiha sa Repait Repait. Na so Salakaw ki Ibn Taimiyah na miyamakalala a mga Imam a datar o Imam Ahmad Bin Hambal na aya Tindo iyan a Simba niyan sii ko Oman gawii na tlo gatos Raka’at. Miya-aloy anan o Imam Dhahabi sii ko kitab iyan a “Tadhkiratul Huffadh” page 2/120. Na Khakokom iyo pn sa Bid’ah so Imam Ahmad, ago so salakaw rka niyan a miyamakalala a mga Imam a miyamando sa mga amal iran sii ko mattndo a oras.

    Aya ikadowa a khakokom iyo sa Bid'ah na so mga Madrasah niyo san sa Marawi ka Tindoan iyo mambo sa gawii a kap'phangndaowa niyo ko mga Morit iyo sa madrasah ka Lagid o kiyatndoa niyo ko Sapto ago Ahad a gawii a pangadian, na knaba niyo anan matag biyaloy a adat ka Biyaloy niyo dn a wajib (paliyogat) ko mga morit iyo a kap'phakadarpa iran sii ko mappnto a gawii a tindo iyo ka aya karina sa kiyabaloya niyo ron a Wajib na opamaka pagabsent so isa kiran na inimbongt iyo ron, na Khakokom iyo mambo anan sa Bid'ah sa Lagid o kiyakokoma niyo sa bid'ah ko kapagi'tikaf sii ko gawii a khamis sa markaz abubakr, na amaika diniyo anan kokomn sa bid'ah na miyambasa rkano so basa a: Aya kaiilaya niyan ko mga tao na mga pmbodokn na diniyan katawan a ginawa niyan na ska niyan bs i miyakalala a pmbodokn na diniyan maiin'ngka ka sabap ko di niyan khailay a poro a ulo niyan!.


وصلى الله على سيدنا محمد كما ذكره الذاكرون و غفل عن ذكره الغافلون.



Inisorat i

Shaikh Aminollah Mimbala Batua
Makkah - KSA

Sunday, August 9, 2015

MGA KOKOMAN O KASOLOT SA SISING


بسم الله الرحمن الرحيم


Kokoman o kasising sa Bolawan

So kasising sa Bolawan na Halal ko Babay, na Haram ko mga mama!.

عن أبي مُوسَى ، رَضِيَ اللَّهُ عَنْهُ ، قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " أُحِلَّ لإِنَاثِ أُمَّتِي الذَّهَبُ وَالْحَرِيرُ , وَحُرِّمَ عَلَى ذُكُورِهِمْ " .

Miyakathitayan ko Abumoosa (Radhiallahu anhu), Pitharo iyan: Pitharo o Rasoolullah (S): “Miyahalal sii ko mga bae ko mga umat akn so Bolawan ago so (dinis a) a Silk, na sii miyaharam ko mga datu kiran”.


عن عبد الله بن عباس أن رسول الله صلى الله عليه وسلم رأى خاتما من ذهب في يد رجل فنزعه فطرحه وقال: "يعمد أحدكم إلى جمرة من نار فيجعلها في يده" فقيل للرجل بعد ما ذهب رسول الله صلى الله عليه وسلم خذ خاتمك انتفع به قال لا والله لا آخذه أبدا وقد طرحه رسول الله صلى الله عليه وسلم. رواه مسلم


Miyakathitayan ko Abdullah Bin Abbas, Pitharo iyan: Mataan a so Rasoolullah (S) na adn a  miyailay niyan a sising a Bolawan sii ko Lima o sakatao a mama na piyakindaan iyanon a raks a inipatk o Nabi. Na aya pitharo o Nabi: “opamana khabarao o isa rkano a so waga na thagoon iyan sa lima niyan”. Na aya miyatharo ko mama sii ko oriyan o kiyaipos o Nabi: kowaa nga ki a sising ka uto na gonga gonai. Na aya pitharo o mama: Di, ibt ko Allah ka di ko dn khowaan ka sabap ko kinilbadnon o Rasoolullah. Piyanothol o Muslim.


Note: Aya thanodan san na aya bolawan a Halal so kaphagosaraon o babay na so mga Jewelry (trinkets) a sii phagosara ko ithatanosan o Lawas o bae a datar o aritis a bolawan, go sising a bolawan, go salay a bolawan, go rinti a bolawan, go singkil a bolawan, na palaya dn anan Halal a kaphagosaraon o babay, ogaid na so mga pd a gamit sa walay a datar o kabo (sakdo) a bolawan go Lapad a bolawan go baso a bolawan go saridot a bolawan go salday a bolawan, go ragom a bolawan, go panisig a bolawan ago so Lagid anan a mga gamit a poon sa bolawan na Haram ko datu ago bae so kaphagosara iranon.

Aya miyatabiya san a khapakay ko Datu ago so Bae na tlo:

1- Ngipn: sa aya ibarat iyan na opamaka kiyaspoan na khapakay a pakisambian iyan sa bolawan so miyaspo ko ngipn iran.


2- Poro a Kmr: aya ibarat iyan na opamaka miyapotol so poro a kmr iyan na khapakay a pakisambian iyan sa bolawan, inontabo ko ama a lima.

3- Ngirong: aya ibarat iyan na opamaka miyapotolon so ngirong iyan na khapakay a pakisambian iyan sa bolawan.


Kokoman o kasising sa Silver

So kasising sa Silver na Sunnah a Kokoman iyan.

قال الإمام عبد الله بافضل الحضرمي الشافعي في المقدمة الحضرمية: "ويسن التختم بالفضة للرجل". اهـ
Pitharo o Imam Abdullah Bafadhl Al-Hadhrami: “Sunnah a Kokoman o kasising sa Silver sii ko mama”.


Kataya so saba-ad ko mga dalil sa kasosonat o kasising sa Silver

وعَن ابْنِ عُمَرَ رَضي اللهُ عَنهُمَا: "أنَّ رَسُولَ اللهِ صَلَّى اللهُ عَلَيْهِ وسلَّمَ اتَّخَذَ خَاتَمًا مِنْ فِضَّةٍ، فَاتَّخَذَ النَّاسُ خَواتِيمَ الفِضَّة ". رواه البخاري

Pitharo o Ibn Omar (Radhiallahu anhuma): “Mataan a so Rasoolullah (S) na misising sa sising a silver, na miyamanolot mambo so mga tao sa mga sising a silver”. Piyanothol o Bukhari.


ما رواه أنس بن مالك –رضي الله عنه – أن النبي صلى الله عليه وسلم قال: "أمرت بالنعلين و الخاتم". أخرجه السيوطي في الجامع الصغير.

Miyakathitayan ko Anas Bin Malik a pitharo iyan: Mataan a so Nabi (S) na pitharo iyan: “isosogo rakn so kasolot sa dowa a sandal ago so kasolot sa sising”. Piyanothol o Imam Assoyooti.


وقال معاذ رضي الله عنه: "ركعتان من متختم أفضل من سبعين ركعة من غير متختم". أخرجه الإمام الصفوري الشافعي في نزهة المجالس و منتخب النفائس.

Pitharo o Mu’adh (Radhiallahu anhu): “So dowa raka’at a sambayang o tao a somosolot sa sising na Thomo a diso pitopolo raka’at a sambayang o tao a knaba somosolot sa sising”. Piyanothol o Imam Assafoori Asshafi’i.


SO SOLOTAN SA SISING KO MGA KMR

Miyaompong so mga ulama ko pat a Madhab sa so Babay na mapapakay rka niyan a sising sii ko apiya anda ko mga Kmr o mbala a Lima niyan ago sii ko mga kmr o mbala a ai niyan. 


قالت الموسوعة الفقهية الكويتية: "لم يختلف الفقهاء في موضع التختم بالنسبة للمرأة ، لأنه تزين في حقها ، ولها أن تضع خاتمها في أصابع يديها أو رجليها أو حيث شاءت". اهـ


Pitharo o mga Ulama a author ko Kitab a Al-Mausoo’ah Al-Fiqhiyyah Al-Kuwaitiyyah: “ Da kazozopakai o mga Ulama so solotan o babay sa sising ko mga kmr iyan ka sabap sa so sising na parahiyasan iyan anan na mapapakay rka niyan sa apiya anda niyan dn thagoa ko mga Kmr o mbala a Lima niyan odi na so mga kmr o mbala a ski niyan sa sadn sa kabaya iyan a pakapsisingn iyanon”.

na sii siran miyaoparik ko mipantagon ko Mama, Na ogaid na miyaumpong siran sa aya makallbi a kapsising o mama na sii sa Tingting a Lima ka giyoto i kasising o Nabi a sii sa Tingting.



عَنْ أَنَسٍ رَضِيَ اللَّهُ عَنْهُ قَالَ: "صَنَعَ النَّبِيُّ صَلَّى اللَّهُ عَلَيْهِ وَسَلَّمَ خَاتَمًا ، قَالَ : إِنَّا اتَّخَذْنَا خَاتَمًا وَنَقَشْنَا فِيهِ نَقْشًا ، فَلَا يَنْقُشَنَّ عَلَيْهِ أَحَدٌ . قَالَ : فَإِنِّي لَأَرَى بَرِيقَهُ فِي خِنْصَرِهِ ". رواه البخاري (5874)، وبوب عليه بقوله : باب الخاتم في الخنصر

Miyakathitayan ko Anas (Radhiallahu anhu), Pitharo iyan: Mimbaal so Nabi (S) sa sising. na aya Pitharo iyan: “mataan a skami na mimbaal kami sa sising na adn a inigaang (inisorat) ami ron a Sorat, na di plapisi o isa rkano so nganin a inigaang ami ron” pitharo o Anas: matamataan a phagilaing ko a katimnag o sising iyan sii sa Tingting iyan”. Piyanothol o Bukhari.


قال الإمام ابن الملقن الشافعي في الإعلام بفوائد عمدة الأحكام: "وأجمع المسلمون على أن السنة جعل خاتم الرجل في الخنصر ، وأما المرأة فإنها تتخذ خواتم في أصابع.

Pitharo o Imam Ibn Mulaqqin Asshafi’i: “Miyaumpong so mga (ulama o mga) muslim sa aya Sunnah a kapsising o mama na sii sa tingting, na so babay na mapapakay rka niyan a pakasolotn iyan sa mga sising so mga kmr iyan”. giyanan i katharo o Imam Ibn Mulaqqin.


Na sii siran miyaoparik o anda i makallbi ko tingting o kawanan a Lima niyan antaaka sii sa Tingting o diwang a Lima niyan?!.

Aya Pitindgan o madhab a Maliki ago Hambali na aya makallbi ko mama na sii psising ko Tingting o diwang a Lima niyan.



Na aya tindg o madhab tano a Shafi’i na aya Sunnah a kasising na sii sa Tingting. Khapakay sii ko tingting o kawanan a Lima ago khapakay sii ko tingting o diwang a Lima ka so Nabi (S) na miyakasising sa kawanan ago miyakasising pn sa diwang, na ogaid na aya Makallbi na sii sa kawanan a Lima ka so kawanan na ronon domadait ptampara so parahiyasan.




قال الإمام ابن الملقن الشافعي: "وقد ثبت في الصحيح أنه عليه الصلاة والسلام تختم في اليمين و اليسار في الخنصر".
Pitharo o Imam Ibn Al-Mulaqqin Asshafi’i: “Sabnar a miya-aloy sa hadith a Saheeh a mataan a so Nabi (S) na miyakasising ko (tingting a) kawanan ago miyakasising sa diwang sii ko tingting”.


So kasising sii ko salakaw ko Tingting

Miya-aloy tano a so babay na mapapakay rka niyan so kasising ko apiya anda sii ko mga Kmr o mbala a Lima niyan ago sii ko mga kmr a ai niyan. na sii ko Mama na aya kokoman o kapsising iyan sii ko salakaw ko Tingting iyan ka datar o diyaramanis, odi na Lomalabao, odi na Totoro, odi na ama a Lima na Makrooh, ago khapakay pn a Maolog sa Haram.


عن علي رضي الله تعالى عنه قال : « نهاني رسول الله صلى الله عليه وسلم أن أتختم في أصبعي هذه أو هذه قال : فأومأ إلى الوسطى والتي تليها » .
Miyakathitayan ko Ali (Radhiallahu anhu) pitharo iyan: “Inisapar rakn o Nabi iba ko sising sii sa giyai a kmr ago sii sa giyai a isa a kmr, na itotoro iyan so Lomalabao ago so Totoro”.


قال الإمام ابن حجرالهيتمي الشافعي: "و يكره لبسه (أي الخاتم) في غير الخنصر و قيل : يحرم". اهـ
Pitharo o Imam Ibn Hajar Al-Haitami: “Makrooh a kokoman o kasising o mama sii ko salakaw ko tingting, ago aya pd a miya-aloy a kokoman iyan na Haram dn.


قال الإمام محمد عبد الله الجرداني الشافعي: "ويسن لبسه (أي الخاتم) في خنصر يمينه أو يساره و اليمين أفضل ، ويكره في غير الخنصر وقيل : يحرم". اهـ

Pitharo o Imam Muhammad Al-Jurdaani Asshafi’i: “Aya Sunnah a kapsising o mama na sii sa tingting o kawanan a Lima niyan odi na sii sa tingting a diwang a Lima, na ogaid na so sii sa kawanan a Lima na aya Makallbi. Na Makrooh a Kokoman o kasising sii ko salakaw ko Tingting, ago aya pd a miya-aloy a kokoman iyan na Haram”.


Sii ko Madhab a Hambali na piyakay niyan ko mama so kasising sa Diyaramanis ago sa ama a Lima, na Makrooh rka niyan so kasising iyan sa Lomalabao ago sa Totoro.


KOKOMAN O KAPNGGAANGI KO SISING

So kapnggaangi ko sising a giyanan so kasorati ron sa ingaran o kirkon odi na ingaran o Allah odi na apiya antonaa dn a Tasbih (Dhikr) ko Allah na mapapakay sii ko Madhab tano a Shafi’i ago sii ko Madhab a Hanafi. Na amay ka sold sa Toilet so tao na pagnaa niyan sa Bolsa niyan so sising iyan a kasosoratan sa ingaran o Allah, odi na sii ko didalm a totob iyan.


Kataya so migagaang a mga sorat sii ko sising o Nabi ago so mga sising o pat a Khalifah

Aya migagaang a sorat ko sising o Nabi Muhammad (S) na:

محمد رسول الله
So Muhammad na Sogo o Allah


Na so sising o Abubakr na:

نعم القادر الله
Aya titho a malai Qudrat na so Allah


Na so sising o Omar Bin Al-Khattab na:

كفى بالموت واعظا يا عمر
Kiyatangkaan a so Kapatay na makawasiyat rka Hay Omar


Na so sising o Uthman Bin Affan na:

آمنت بالله مخلصا
Piyaratiyaya ko so Allah sa Titho a Ikhlas


Na so sising o Ali na:

الملك لله
So kadatu na rk o Allah



KOKOMAN O KASISING SA POTAW, GO GALANG, AGO TIMGA

قال الإمام ابن حجرالهيتمي الشافعي: "ويجوز التختم بنحو الحديد و النحاس و الرصاص بلا كراهة". اهـ
Pitharo o Imam Ibn Hajar Al-Haitami Asshafi’i: “Mapapakay so kasising sa potaw ago galang, ago Timga”.


KOKOMAN O KAPAGARITIS SA NGIRONG AGO SA TANGILA

قال الإمام محمد نووي الجاوي الشافعي: "ويحرم خرم الأنف ليجعل فيه حلقة من ذهب أو نحوه لا فرق في ذلك بين الذكر و الأنثى...وأما الأنثى فيجوز خرم أذنها على المعتمد". اهـ

Pitharo o Imam Muhammad Nawawi Al-Jaawi Asshafi’i (died 1898 G): “Haram so kapsowi ko ngiron a para ko kathagowi ron sa aritis a bolawan ago so salakaw san a aritis, sa daa pimbidaan san o mama ago babay (maana haram kiran a dowa so kapsowi ko ngirong)...na so Mipantag ko babay na aya authentic a Fatwa sii ko Madhab a Shafi’i na Mapapakay so kapsowi ko Tangila niyan (a para sa aritis)”. 


TONAI KOKOMAN O KAZALAY AGO KAPRINTI AGO KAPAGARITIS SII KO MAMA

Aya kokoman o kazalay ago kaprinti ago kapagaritis sii ko mama na Haram, ka sabap sa special anan a mga jewelry (trinkets) sii ko babay, na ponon solot so mama na kiyapananayanan iyan so babay.

قال النَّوويُّ في المجموع شرح المهذَّب": "قال أصحابُنا: يَجوزُ للرجُل خاتمُ الفضَّة بالإجْماع، وأمَّا ما سواه من حلي الفضَّة: كالسوار، والدمْلُج، والطَّوق، ونحوها، فقَطَع الجمهورُ بتحريمِها ". اهـ.


Pitharo o Imam Nawawi: “Pitharo o mga pd ami a mga shafi’i a mga ulama na kiyaopakatan a kapapakay o sising a silver sii ko mama, na so salakaw san a lagid o mga Jewelry (trinkets) a silver a datar o rinti sa lima ago rinti sa braso ago salay ago ndalagid anan a mga Jewelry na aya kiyokomanon o kadaklan a mga ulama na Haram”.


         وصلى الله على سيدنا محمد كما ذكره الذكرون و غفل عن ذكره الغافلون


Inisorat i
Shaikh Aminollah Mimbala Batua
Makkah - KSA

Thursday, July 30, 2015

KOKOMAN O KANDITAR SA MARIGA



بسم الله الرحمن الرحيم

    So kanditar (kambangkala) sa nditarn a Mariga i warna (color) a kasasaogan sa pd a warna na miyaopakaton so pat a Madhab (Hanafi, Shafi’i, Maliki, Hambali) sa Kapapakay niyan sii ko datu ago sii ko bai. Na sii siran miyaoparik ko kokoman o kanditar sa nditarn a full a mariga i warna,  ogaid na daa ba kiranon komiyokom sa haram ka aya taman na kiyokom o saba-ad kiran sa matag Makrooh.


    Aya pitindgan o Madhab tano a mga Shafi’i ago so mga Maliki ago so saba-ad ko mga Hambali na mapapakay (Halal) so kanditar sa nditarn a full a mariga i warna.

قال الإمام النووي الشافعي في شرح المهذب: "يجوز لبس الثوب الأبيض  و الأحمر و الأصفر و الأخضر و المخطط و غيرها من ألوان الثياب". اهـ


Pitharo o Shaikhul Islam Imam Nawawi: “Khapakay so kasolot sa nditarn a mapoti, go mariga, go binaning, go gadong, go tiris (striped) ago so salakaw san a mga pd a warna o mga nditarn”.


Kataya so mga dalil sa kapapakay o kanditar sa nditarn a full a Mariga i warna:

حديث البراء بن عازب رضي الله عنه قال: (رَأَيتُ النَّبِيَّ صَلَّى اللهُ عَلَيهِ وَسَلَّمَ فِي حُلَّةٍ حَمرَاءَ) متفق عليه.

Pitharo o Albarra Bin Al’azib (Radhiallahu anhu): “Miyailay akn so Nabi (S) a ndiditar sa nditarn a Mariga”. Muttafaqon ‘alayhi.
  

وروى عَامِرٍ بن عمرو الأنصاري ، قَالَ : " رَأَيْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ بِمِنًى يَخْطُبُ عَلَى بَغْلَةٍ ، وَعَلَيْهِ بُرْدٌ أَحْمَرُ ، وَعَلِيٌّ أَمَامَهُ يعبر عَنْهُ". رواه أبو داود

Miyakathitayan ko ‘Amir bin ‘Amr Al-Ansary, pitharo iyan: “Miyailay akn so Rasoolullah (S) sii sa mina a Kokoda a p’phangotba, na kokokos sa mariga a kokos, na so Ali na sii kakadn sa unaan o Nabi a ipsampay niyan so katharo o Nabi”. Piyanothol o Abudawood.


عن ابن عباس قال : كان رسول الله - صلى الله عليه وسلم - يلبس يوم العيد بردة حمراء رواه الطبراني في الأوسط ورجاله ثقات.

Miyakathitayan ko Abdullah Bin Abbas, pitharo iyan: “Aya ulaola o Nabi (S) igira a gawii a Eid na phagosar sa kokos a mariga”. Piyanothol o Imam Attabarani.


عَنْ جَابِرِ بْنِ عَبْدِ اللَّهِ ، أَنَّ النَّبِيَّ صَلَّى اللَّهُ عَلَيْهِ وَسَلَّمَ : " كَانَ يَلْبَسُ بُرْدَهُ الأَحْمَرَ وَعِمَامَتَهُ السَّوْدَاءَ فِي الْعِيدَيْنِ وَالْجُمُعَةِ ". رواه البيهقي

Miyakathitayan ko Jabir Bin Abdullah, Pitharo iyan: “mataan a so Nabi (S) na phagosar sa kokos a mariga ago psolotn iyan so Turban iyan a maitm sii ko dowa a eid ago sii ko gawii a Jama’at”. Piyanothol o Imam Al-Bayhaqi.


وعن جابر بن سمرة ـ رضي الله عنه ـ قال: ( رأيت رسول الله ـ صلى الله عليه وسلم ـ في ليلة إضحيان (مضيئة مقمرة) وعليه حُلة حمراء، فجعلت أنظر إليه وإلي القمر، فلهو عندي أحسن من القمر ) رواه الترمذي .

Miyakathitayan ko Jabir Bin Samurah, Pitharo iyan: “Miyailay akn so Rasoolullah (S) sii ko gagawii a makaliliwanag so ulan na somosolot so Nabi (S) na nditarn a Mariga, na aya sosowaan akn na dasa aya tntngan akn na so Nabi na dasa sopman so ulan, na aya dn a mataid rakn na so Nabi adiso ulan”. Piyanothol o imam Tirmidhi.


ما رواه وهب بن عبد الله – رضي الله عنه- قال: ( رأيت رسول الله صلى الله عليه وسلم في قبة حمراء من أدم ، ورأيت بلالا أخذ وضوء رسول الله صلى الله عليه وسلم ، ورأيت الناس يبتدرون ذاك الوضوء ، فمن أصاب منه شيئا تمسح به ، ومن لم يصيب منه شيئا أخذ من بلل يد صاحبه ، ثم رأيت بلالا أخذ عنزة فركزها، وخرج النبي صلى الله عليه وسلم في حلة حمراء مشمرا ، صلى إلى العنزة بالناس ركعتين، ورأيت الناس والدواب، يمرون من بين يدي العنزة ). رواه البخارى

Miyakathitayan ko Wahb Bin Abdullah –Radhiallahu anhu- Pitharo iyan: “Miyailay akn so Rasoolullah (S) a aya collar o kimon iyan na mariga a poon sa panit (kobal), ago miyailay akn so Bilal a aawidan iyan so ig a minipagabdas o Rasoolullah, na aya siyowa o mga tao na piyamagoradoradan iran a giyoto a ig na so p’phakakowa sa ig uto na dii niyan gipanizing sa lawas iyan na so daon makakowa na sii pkowa ko middkt a ig ko Lima o pd iyan, na oriyan uto na miyailay akn so Bilal a kominowa sa maito a giyoray na iniskhad iyan, na Lominiyo so Nabi (S) a magagaanggaan a kapzagad iyan a ndiditar sa mariga a nditarn, na mizambayang so Nabi a pagiimaman iyan so mga tao na sii ska niyan aadap sa giyoto a giyoray (a iniskad o Bilal), na so mga tao ago so mga ayam na sii siran pphakaokit sii sa una-an a giyoto a giyoray”. Piyanothol o Bukhari.


     Aya katharo o Imam Ibn Rajab na giyangkoto a kiyasambayang o Nabi a ndiditar ska niyan sa mariga a nditarn na makatotoro uto sa khapakay a misambayang so nditarn a mariga. Giyanan i katharo o imam Ibn Rajab, na ti opamaka miyapakay so kanditar sa mariga sii ko sold o sambayang na mas Lbi a kapapakay niyan sii ko liyo o sambayang. Ago Liyo roo pn na opamaka marata so kanditar sa nditarn a mariga na aya dn a Mananggilaon na so Nabi, na ino ron pn minditar so Nabi ka karina sa knaba isasapar.


Na sakamauto mambo so mga Bae na mapapakay kiran so kanditar sa Mariga sa aya Sharat na kasasapngan iyan so aurat o bae ago malowag ago knaba phagalong. Aya dalil sa kiyapakay o nditarn a mariga sii ko Bae na mismo so dn so Nabi i minditar sa nditarn mariga, ago daa dalil iba adn a Tindo o Nabi a Warna aba niyan inipaliyogat ko mga bae.


Aya Pitindgan o Madhab o mga Hanafi ago so Madhab o mga Hambali na Makrooh so kanditar sa nditarn a full a Mariga i warna a dadn a misasaogon a pd a warna. Aya dalil iran a hadith na:

عن عبد الله بن عمرو قال: "مر على النبي صلى الله عليه وسلم رجل وعليه ثوبان أحمران فسلم عليه فلم يرد عليه النبي صلى الله عليه وسلم". رواه أبو داود

Miyakathitayan ko Abdullah Bin ‘Amr a Pitharo iyan: “Somiyagad ko Nabi (S) a mama a ndiditar sa dowa timan a nditarn a mga ririga na Siyalam iyan so Nabi (S) na daon pakandoda o Nabi so salam”.


     Simbag o mga Ulama a giyanan a dalil na Hadith anan a Dha’eef! Ka aya dn a Komiyokomon sa Dha’eef na so Ameerol Mu’mineen ko ilmo a hadith a ska niyan so Imam Ibn hajar Al-Asqalanie. na Liyo ko kababaloy niyan a Dha’eef na knaba sii pn sabap ko warna a mariga ada kasmbaga o Nabi sa giyoto a mama ka adn a pd a sabap, ka opamaka aya reason a daon kasmbaga o Nabi na sabap ko warna a mariga na kokoma a aya piyakarata o Nabi na giya ginawa niyan ka ska niyan mismo i miyakalala a minditar sa mariga, ka ino i mariga a matag warna a Lagid o mga pd a warna a knaba phakamaulika. Ago liyo roo pn na mas mabagr so mga dalil ko kapapakay o kanditar sa mariga ka sabap sa aya dn a minditaron na so dn so Nabi (S).


يقول ابن قدامة الحنبلي رحمه الله: "والأحاديث الأُوَل - يعني أدلة الجواز - أثبت وأبين في الحكم؛ فإن ترك النبي صلى الله عليه وسلم لرد السلام عليه يحتمل أن يكون لمعنى غير الحمرة... ولأن الحمرة لون، فهي كسائر الألوان" "المغني" (1/420).

Pitharo o Imam Ibn Quddamah Al-Hambali: “So mga hadith a dalil sa kapapakay o kanditar sa mariga na mas mabagr ago mas marayag i kokoman, ka giyoto a da kasmbaga o Nabi sa kiyasalamaon a mama uto na khapakay a adn a pd a sabap a knaba sii sabap ko Mariga a warna...ka so Mariga na matag warna a aya lagid iyan na datar mambo o mga pd a warna”.


و صلى الله على سيدنا محمد كما ذكره الذاكرون و غفل عن ذكره الغافلون


Inisorat i 
Shaikh Aminollah Mimbala Batua
Makkah - KSA